"南農女力"影片發表 紀錄臺南出腳查某農民

公視 2021-04-08 23:10
臺南市農業局8冬前,揣大約1500位年輕人來作穡,女性嘛占四分之一。今年農業局專工針對遮的女性農民,做一齣紀錄片,咱做伙來了解這寡人的心聲。

看天食飯的作穡人敢一定攏是查埔的?其實女性作農的人數,嘛愈來愈濟;台南市農業局就特別拍一支「南農女力」影片,紀錄台南在地的3位女性農民,in歡喜落田、毋驚風吹日曝、甘願作穡的苦澀酸甜。

台南市農業局8冬前、開始推動「新農人計畫」,到今已經招募大約1500位少年人,其中包括有365位女性農民,佔有四分之一。若講著女性的優勢,in講in作穡毋但閣較頂真、身段閣較軟,若欲和人盤撋交陪嘛通更加順溜有伸勼。



毋是干焦查埔人才有才調踏入田塗、忍受作穡粗重;遮也有一陣女性毋驚曝烏、毋驚食苦,繼續為台灣農業盡心拍拚。農業局表示,這支影片,毋但為著感謝in豐沛臺南農產的發展,更加希望會當透過影片,吸引閣較濟女性加入作農的行列。

相關熱門

綠色永續