徙走第8車廂閣發現部份身屍部位 待DNA鑑定

公視 2021-04-07 23:10
太魯閣自強號的第8節車廂徙出磅空了後,現場閣有發現屍身,花蓮地檢署表示會採樣做鑑定。另外,佇這場意外過往的一對兄妹仔,in 體育大學的同學今仔日是來到花蓮殯儀館,欲來共in 送。   國立體育大學的兄妹仔張恩翔、張恩昀,一家伙仔四个人佇太魯閣號事故中,干焦媽媽活落來。初七早起,體大的同學、親情好 友攏來參加追思,也有親人共張家厝裡的狗tshuā來見主人最後一面,花蓮地檢署檢察長俞秀端也來到現場,說明佇主現場的車廂全部徙走後的調查狀況。



檢察長表示,目前50位死者,確認身份的有49位,其中47位已經核發死亡證明,有2人因為是外籍猶未核發,遺體會先囥佇殯儀館。另外外界關心台鐵向義祥工程提出查扣財產的部份,花蓮地方法院嘛出面說明。

臺鐵事件的刑事佮民事賠償責任受外界關注,俞秀端也講,佇刑責部份、檢察署成立專案小組,由主任檢察官指揮6位檢察官,會逐工召開專案會議,希望盡速完成真相的調查。

相關熱門

綠色永續