簡單的手勢佮戲文，囡仔學了誠緊，參加營隊的囡仔，綴咧阿龍團長後壁，第一步愛先學上台自我介紹。
愛學身段、學拍鑼鼓，這陣囡仔上有興趣的，就是體驗穿戲服。
兩工的戲劇營隊，囡仔著分組劇本、化妝、搬歌仔戲，江明龍負責全部的課程，伊舊年底佇高雄成立這个體驗館，毋但重現竹篙棚，請師傅親手畫戲台布景，後台嘛有真濟伊爸母的戲團收藏幾若十冬的寶。
江明龍講，因為厝內有歌仔戲團，伊佇老母腹肚內就學唱歌仔戲，大漢了後毋但搬戲，伊嘛編戲、做導演，作品有傳統的嘛有現代的，有時間就四界教囡仔唱歌仔戲。
雖罔這馬真濟囡仔台語袂輾轉，有的閣毋捌看過歌仔戲，伊希望透過體驗，予逐家真正了解歌仔戲是啥物，自然歌仔戲文化就會當保存。
