生態攝影師組團隊 招囡仔那上山那講臺語

公視 2021-02-22 23:10
有袂少母語家庭想欲替囡仔揣全臺語的活動,煞是真僫揣。本身就真愛爬山,嘛是生態攝影師的周俊廷,三年前就創一个「生態行踏團」,招大人囡仔peh山,有人一加入就牢咧,眾人攏希望講母語,就親像接近大自然遐邇自然。

囡仔學用竹葉歕觱仔,有囡仔歕甲喙䫌膨膨,猶歕無路裡來。閣有囡仔揀焦去的竹仔殼,欲來看痟鬼仔殼按怎做。

咧欲PEH來到山頂的時,逐家閣發現真心適的植物。

今年37歲的周俊廷,因為細漢就佇草地大漢,希望囝仔會當透過行踏,感受四季無仝的變化,三年前創這个行踏團,就望生態和母語會當自然結合,也有爸爸媽媽生第二胎矣,閣來peh。



來到山頂,大人囝仔攏予大崙山的媠吸引,阿廷也借東北季風教逐家拗紙做風吹,囝仔攏耍甲歡喜甲。

因為佮意行踏,也愛台語,所以聚集做伙,生態行踏團的tshuā路蟲周俊廷寄望囝仔講母語像PEH山仝款自然,家長也望囝仔大漢,不管搪著啥物困難,攏會記得佇山內學著的智識,袂輸高山遐爾堅定。