臺中石頭公園拚轉型 揣學生用廢材做攝影妝娗

公視 2021-02-22 23:10
臺中外埔的石頭公園過去是誠出名的遊樂園,拋荒真濟冬了後,後來閣轉型做生態農場。這馬,為著吸引欲結婚的人來遮翕結婚相,園區佮大甲高中合作,予學生佇歇寒的時陣,來幫公園設計一寡會當翕相的背景。

先共塗硩予平,閣用花草拓印,落尾灌石膏,做出特別的石膏版畫。製作過程中,大甲高中美工科的學生是誠頂真。欲利用歇寒,綴學長總監,學習美工實作的技巧。

過去石頭公園是誠出名的遊樂園,後來拋荒。這馬除了保留60年代的遊樂設施,也結合園區戶外生態池、落羽松等等景色,發展休閒農場。為著吸引閣較濟人來遮翕相、攝影,地主葉石頭先生閣揣大甲高中美工科的校友,蘇耿紹,來做設計總監,欲共室內空間重新改造,予欲結婚的新人通來翕相。



利用五工的實習機會,予學生了解,按怎利用廢材做裝置藝術,打造各種予新人翕相的背景佮妝娗。珍貴的實作經驗,毋但會當增進美工能力,in也同齊投入園區活化,為地方創造新商機,這攏是佇課本學袂著的課程。