居留證過期著遣返 3移工指責雇主.中人過失

公視 2021-02-22 23:10
臺灣國際勞工協會今仔日開記者會,講in佇過去一年內接著三个案件,攏是中人抑是雇主失覺察,害著外籍移工的居留過期,必須愛遣返轉去。等於是無做毋著代誌,煞著愛受人處罰。

台灣國際勞工協會TIWA今仔日佇移民署頭前開記者會,講in佇過去一冬內,陸續接著三位外籍移工來投,講因為中人或者是雇主的疏失,害in居留證件過期。TIWA向移民署陳情,移民署講,按照規定移工居留過期以後三十工內,是會使佇納罰款了後重新申請居留。毋過TIWA是講,移工的證件佮文件攏囥佇中人佮雇主遐,而且若欲佇平常日出外辦代誌,移工著愛請假,對in來講是較困難。



現場嘛有立委指出,移民署應該代先有調查程序才會當做處分,袂使無分無會就共移工遣返。

雖然講政府早就有針對外國專業人才安排到場一擺就通完成所有證件審查佮發放的「就業金卡」服務,但是服務的對象並無包括做工的外籍移工。有立委認為這種差別待遇嘛需要檢討。

毋過移民署回應,疫情期間,重新辦理居留的期限,已經放冗到居留過期後90工以內,但是今仔日勞工團體講著的這三个移工,是已經過期300外日,猶是需要按照法律來辦理。若是針對現場立委講著的建議,會閣和勞動部參詳討論。