櫻花當著時 新竹公園.五峰山頂農場溢遊客

公視 2021-02-21 23:10
這陣台灣的櫻花開甲當媠,因為無法度出國,各地景點煏人陣,親像新竹五峰山的農場,櫻花開甲規山坪,遊客加3成。另外新竹市區的公園,種超過8百欉的櫻花,遊賞的民眾講、美景並日本無較輸。

一欉一欉粉紅色的櫻花樹開甲滿山坪,放眼看過去,袂輸去到日本,海拔1200公尺的新竹五峰山頂農場,有3種無仝品種的櫻花,今年櫻花當開,遊客佮過去相比加了誠濟。

除了山頂有櫻花通看,無想欲走傷遠的民眾嘛會使考慮,新竹市區內的新竹公園,規片的櫻花樹,目前已經開欲9成,邊仔閣有日本式的建築物,是這站仔新竹民眾較捷行踏的景點。



目前是觀賞櫻花的好時機,民眾除了把握花期,防疫措施嘛著做到透底,保護家己嘛保護別人。