生活 公視 百欉樹仔害人犁田 高市府擬改種茄苳引爭議

百欉樹仔害人犁田 高市府擬改種茄苳引爭議

公視 2021-01-14 23:10
高雄市蓮池潭邊仔的街路,有152欉細葉欖仁樹 (lám-jîn-chhiū),就是俗稱的番仔草橄;市府拍算全部攏換種茄冬樹,因為細葉欖仁的樹子落佇街路,定定害騎機車的民眾跙倒。當地民眾佮護樹團體跳出來反對,認為會當加摒掃來解決公安問題,為怎樣就是欲靠挖樹來解決問題。

左營蓮池潭邊仔,規排的細葉欖仁,發甲足青翠大欉,對面有一排樹仔煞已經予人修剪,因為高雄市府拍算欲共遮的細葉欖仁攏挖起來,換種茄冬樹,主要是因為每一冬的五月到七月,樹子會落佇塗跤害騎oo-tóo-bái的民眾跙倒著傷。



欲共種了十幾冬的樹仔挖起來,而且是152欉,護樹團體真不滿,煩惱徙樹會害樹仔較緊死,民眾嘛講,in早就有1400人連署反對,這馬市府煞雄雄動工,養工處派人出面解釋。

養工處表示,市府初八有開地方說明會,里長民代攏支持,in尊重少數無仝的意見,毋過市府紲落來拍算欲共細葉欖仁、烏枋樹、班芝等等無適合的樹仔徙走換掉,攏是為著市民安全。